سه‌رهه‌نگ موحسین خاوه‌ن به‌ڵێنی خۆیه‌تی
عیماد قادر :
هه‌موومان ده‌زانین چه‌ند هه‌فته‌یه‌كه‌ سه‌رجه‌م ڕاگه‌یاندنه‌كان به‌شێوه‌یه‌كی به‌ربڵاو بایه‌خ و گرنگییه‌كی زۆریان به‌گۆلچی هه‌ڵكه‌وتووی شاری هه‌ولێرسه‌رهه‌نگ موحسین داوه‌ ، ئه‌ویش زیاتر به‌هۆی ئه‌و ئاسته‌ به‌رزه‌ی كه‌ له‌یاری كۆتایی خولی نایابی ئێڕاق به‌رامبه‌ر یانه‌ی زه‌ورا پیشانیدا . سه‌باره‌ت به‌م مه‌سه‌له‌یه‌ش من وه‌ك ڕۆژنامه‌نوسێكی وه‌رزشی زۆر شت سه‌رنجی ڕاكێشاوم و بووه‌ وانه‌یه‌كی زیندوو له‌بیرو هزرمدا ئه‌ویش ئه‌و خوڕه‌وشته‌ به‌رزه‌یه‌ كه‌ له‌خهودی ئه‌و یاریزانه‌دا هه‌یه‌ كه‌ تاسه‌رئێسقان پابه‌نده‌ به‌واده‌و به‌ڵێنی خۆی ، ئه‌و تاهه‌ر ڕۆژنامه‌نووسێكی وه‌رزشی كاتێك داوای دیمانه‌ له‌سه‌رهه‌نگ موحسین ده‌كات ئه‌میش بێ یه‌ك و دوو له‌كات و ساتی دیاریكراو ئاماده‌ ده‌بێت و هه‌موو ئیشوكارێكی تایبه‌تی خۆی به‌لاوه‌ ده‌نێت ، به‌پێچه‌وانه‌ی ئه‌و یاریزانانه‌ی كه‌ ده‌گه‌نه‌ لوتكه‌ و كه‌مێك ناودار ده‌بن ئیدی لوتیان ده‌چێت به‌ئاسماندا و حیساب بۆ كه‌س ناكه‌ن . هه‌ڵوێستێكی دیكه‌ی ئه‌و به‌ڕێزه‌ ئه‌وه‌یه‌ كه‌ وه‌ك خۆی ئاماژه‌ی بۆ كرد ڕۆژانه‌ وه‌ڵامی ده‌یان و سه‌دان ته‌له‌فۆنی هه‌وادارای ده‌داته‌وه‌ و به‌زمانی شیرین له‌گه‌ڵیاندا ده‌دوێ ، بۆیه‌ هیوادارین ئه‌وه‌یان ببێته‌ وانه‌یه‌ك بۆ هه‌موو ئه‌وانه‌ی له‌لوتكه‌ی داهێنان دان ، چونكه‌ مرۆڤ هه‌میشه‌ به‌ساده‌یی و ساكاری گره‌وی ژیان ده‌باته‌وه‌ ، نه‌ به‌لووت به‌رزی و له‌خۆبایی بوون ، چونكه‌ ئه‌وانه‌ی له‌خۆبایی بوون هه‌ر زوو شكستیان خوارد و له‌به‌رچاوان وون بوون .


سه‌رچاوه‌ : خه‌بات
 

گه‌ڕانه‌وه‌ بۆ به‌شی هه‌واڵ و چالاكییه‌كان >>>