دەسەڵات هۆكاری
سەرەكیی دواكەوتنی وەرزشە لە كوردستاندا
سامان بریفكانی
باڵادەستی حزبایەتی لەنێو بواری وەرزش لە كوردستاندا هۆكارێكی گەورەی دواكەوتنی
ئەو بوارە گرنگەیە ، كە بە هۆیەوە رەوتی وەرزش هەنگاوێك بۆ پێشەوە دەنێت و دوان
بۆ دواوە دەگەڕێتەوە . كارنەكردنیش بۆ لابردنی سیستمی تێكەڵبوونی سیاسەت و
وەرزش ئەنجامی خراپی لە دواوە دەبێت و پاشان چارەسەركردنی ستەم دەبێت . لوتكەی
بەرپرسێتیی وەرزشی وڵاتەكەم لەسەر بنەمای حزبی دروست بووە و دوای ئەو لوتكەیەش
لەو هەڕەمەدا هیچ پۆستێك نابیندرێ لەسەر ئەو بنەمایە دابەش نەكرابێ . ئەو
وەرزشوانەی سەر بەو دوو حزبە نییە ، جێگەی لە وەرزش نابێتەوە و هیچ حسابێكیشی
بۆ ناكرێ ئەگەر باشترین وەرزشوانیش بێت . بە پێچەوانەوە ، زۆر بەرپرسی
گەورەشمان لە ژیانی خۆیاندا حەزیان بەو بوارە نەبووە و لەپێناو بەرژەوەندیی
خۆیان كورسیی خەڵكی دیكەیان داگیر كردووە .
دوای تێكەڵبوونەوەی وەرزشی هەردوو پارچەكەی پێشوو ، وەرزش دۆستان بە پەرۆشەوە
چاوەڕوانی وەرزشێكی باشتر و پاكتر و ئاواتیان ئەوە بوو ، وەرزش ببێتە هۆكارێكی
ئیجابی لە نەمانی ململانێی حزبایەتی ، كەچی بە پێچەوانەوە ، ئەو حزبایەتییە
زیاتر خزایە نێو ئەو بوارە و ئێستا كاری كردۆتە سەر ئەنجامی یارییە چارەنووس
سازەكانی خولە وەرزشییەكان و بگرە بەمەش نەوەستاوە ، بەڵكو هاندەرانی وەرزشیش
ململانێی نادروستیان لەنێواندا دروست بووە كە ئەمە حاڵەتێكی ترسناكە و لە
ئایندەیەكی نزیكدا كاردانەوەیەكی خراڵی بەدواوە دەبێت . رۆژبەڕۆژ حزبایەتی
لەنێو وەرزشدا رەگوڕیشەی بەشێوەیەكی بەربڵاو دەچەسپێنێت ، لابردنی مەحاڵ دەبێت
، بۆیە پێویستە لە ئێستاوە بەرپرسە گەورەكان هەوڵ بدەن رێگە چارەیەك بۆ ئەم
تێزە نەشازە بدۆزنەوە و بەرنامەیەكی كار دابنێن و پرس بە خەڵكی شارەزا بكەن و
خەڵكانێكی شیاو و ئەكادیمی بەشداری پێبكەن بۆ دانانی سیستەمێكی نوێ لەسەر
بنەمای هەڵبژاردن و چەسپاندنی رۆحی برایەتی لەنێو وەرزشدا و بنبڕكردنی ململانێی
حزبایەتیی نادروست لەنێو ئەو بوارە پیرۆزەدا و دوورخستنەوەی كەسانێكی دوور لە
وەرزش كە لەسەر بنەمای حزبی پۆستی وەرزشییان پێدراوە ، ئەگەر لەسەر ئەو بناغەیە
كار بكرێت ، دڵنیام لە بەرەوپێشچوونی بزاڤی وەرزش و دواتر ناساندنی دۆزی كورد
لە رێگەی وەرزشی پاك وەرزشوانی بەتوانا بە دەرەوەی وڵات كە ئەمە ئامانجی هەموو
وەرزش دۆستێكی كوردە .